På bokmål
Ein person som søkjer beskyttelse, avgjer ikkje sjølv kva land som skal handsame søknaden. Det første trygge landet asylsøkjaren kjem til, har ansvaret for å handsame søknaden om beskyttelse. Dublin II-forordninga er ein avtale mellom EU-landa, Island og Noreg som sørgjer for at alle asylsøkjarar får søknaden sin handsama i eitt av desse landa.
Når gjeld føresegnene?
Ein søknad blir handsama som ei Dublin-sak dersom søkjaren
- har søkt beskyttelse i eit anna land
- er registrert med fingeravtrykk i eit anna land (det vil seie at personen er teken for ulovleg grensepassering)
- har visum eller opphaldsløyve i eit anna land
Einslege mindreårige asylsøkjarar blir berre returnerte til andre land som er med i Dublin-samarbeidet, dersom dei har søkt beskyttelse i eit anna medlemsland.
Individuell vurdering
UDI vurderer kvar Dublin-sak konkret og individuelt. Vi legg blant anna vekt på kva tilknyting asylsøkjaren har til Noreg, og kva føresetnader søkjaren har for å sikre rettane sine som asylsøkjar i landet vi vurderer å returnere han eller henne til.
Ein søknad om beskyttelse vil ikkje bli handsama etter prosedyren for Dublin-saker dersom søkjaren har ektefelle eller mindreårig barn i Noreg, eller dersom søkjaren er mindreårig og har foreldre i Noreg. I desse tilfella blir søknaden handsama i Noreg.
Registreringar i andre land
Alle asylsøkjarar over 14 år og personar som har kryssa grenser ulovleg, blir registrerte med fingeravtrykk i Eurodac. Eurodac er EUs elektroniske fingeravtrykksregister. Når politiet tek fingeravtrykka til ein asylsøkjar i Noreg, sjekkar dei automatisk om personen er registrert i Eurodac.
Førespurnader til utlandet
Dersom søkjaren er registrert i Eurodac, eller andre opplysningar knyter søkjaren til eit anna medlemsland, ber UDI styresmaktene i dette landet om å handsame søknaden om beskyttelse.
Førespurnader frå utlandet
På same måte som Noreg kan be eit av dei andre medlemslanda om å handsame ein søknad om beskyttelse, kan også andre medlemsland be Noreg om å handsame ein søknad. Når UDI får ein slik førespurnad, vurderer vi om vi er einige i at vi har ansvaret for å handsame søknaden.
Tett internasjonalt samarbeid
Dublin-samarbeidet føreset eit tett samarbeid mellom medlemslanda. Noreg deltek aktivt i dette samarbeidet.
Meir informasjon
