Opphald i Noreg
Når du får beskyttelse i Noreg, får du eit opphaldsløyve som gjeld i inntil tre år. Dette opphaldsløyvet kan normalt fornyast og gi grunnlag for permanent opphaldsløyve i Noreg.
Familien din
Dersom du kom til Noreg saman med ektefellen/partnaren eller sambuaren din, og/eller med ugifte barn under 18 år, kan desse òg få opphaldsløyve. Dersom dei ikkje får godkjent beskyttelse, vurderer norske styresmakter om dei kan få opphaldsløyve på grunn av sterke menneskelege omsyn eller særleg tilknyting til riket.
Dersom familien din er i heimlandet eller eit anna land, gjeld det eigne føresegner.
Meir informasjon om dette finn du på sidene om familieinnvandring.
Reisebevis
Dersom du får godkjent søknaden om beskyttelse, vil norske styresmakter behalde passet ditt om du har eit pass, og du vil få eit reisebevis for flyktning. Dette reisebeviset gjeld ikkje for reiser til heimlandet ditt.
Asylsøkjarar som ikkje får beskyttelse i Noreg, men opphald på grunn av sterke menneskelege omsyn, må vanlegvis få pass frå heimlandet. I spesielle tilfelle kan dei som får opphaldsløyve på grunn av sterke menneskelege omsyn, få norsk utlendingspass.
Meir informasjon om dette finn du på sida om reisedokument.
Busetjing
Dersom du får opphaldsløyve som gir deg rett til å bli busett i ein kommune, vil Integrerings- og mangfaldsdirektoratet (IMDi) finne ein kommune der du kan busetje deg.
Meir informasjon om dette finn du på IMDis heimesider.
Norskopplæring og introduksjonsprogram
Når du har fått opphaldsløyve i Noreg, har du rett og plikt til å delta i norskopplæring og følgje eit introduksjonsprogram.
Meir informasjon
