Tidlegare måtte søkjaren ha hatt opphald i Noreg i minst tre år med same type løyve (for eksempel arbeidsløyve). No kan søkjaren få godkjent permanent opphaldsløyve etter til saman tre års lovleg opphald i landet, sjølv om det er på ulike opphaldsgrunnlag, for eksempel først som familieinnvandrar og deretter som spesialist. Dette kan forklare kvifor vi i 2010 såg ein auke med 13 prosent frå året før både i talet på søknader og i talet på godkjenningar. Totalt fekk 13 800 personar godkjent permanent opphald.
Vi behandla fleire eldre og vanskelege søknader, blant anna fleire saker der vi valde å kalle tilbake familieinnvandringsløyve fordi vi vurderte det som sannsynleg at ekteskapet var inngått proforma. I slike tilfelle avslår vi søknaden om permanent opphald. Vi avslo også relativt mange søknader fordi søkjaren ikkje hadde dokumentert at kravet til gjennomført opplæring i norsk og samfunnskunnskap var oppfylt. Totalt avslo vi 810 av søknadene om permanent opphald, men nokre av dei som fekk slikt avslag, fekk forlengt det tidlegare løyvet.