Er du ektefelle til, sambuar med eller barn under 18 år av ein person som har fått vern i Noreg, kan du få bu i Noreg utan at vi stiller krav til inntekta til denne personen.

Om du er ektefellen til den som bur i Noreg, må de ha gifta dykk før denne personen kom til Noreg, for at de skal få unntak for inntektskravet.

Du må levere søknaden din innan tolv månader frå den datoen som står i vedtaksbrevet til personen som bur i Noreg. Søknaden blir ikkje rekna som levert før du har vore hos ambassaden og levert nødvendig dokumentasjon.

Det kan vere fleire månaders ventetid for å få time hos ambassaden. Derfor bør du søkje så tidleg som råd etter at personen i Noreg fekk vern.

Om du ikkje søkjer innan tolv månader, må familiemedlemmen din i Noreg ha god og stabil inntekt for at søknaden din skal kunne bli godkjend.

• Du må registrere søknaden din innan 6 månader etter datoen som står i vedtaksbrevet om at personen som bur i Noreg, har fått vern.
  • Søknaden om familieinnvandring må vere registrert elektronisk i Søknadsportalen (ekstern nettstad).
  • Søknadsgebyret på 10 500 kroner (tidlegare 8000 kroner) må også vere betalt.
• Du må levere søknaden din innan 12 månader etter den datoen som står i vedtaksbrevet til personen i Noreg.
  • Du leverer søknaden ved å møte opp ved ein norsk ambassade, konsulat eller eit søknadssenter og levere inn alle dokumenta der.
  • Hugs at søknaden først er levert når du møter opp og leverer inn dokumenta.