Norsk pass

Dersom du har vorte norsk statsborgar, kan du få eit vanleg norsk pass. Du får ikkje norsk pass automatisk når du blir norsk statsborgar, du må søke om å få norsk pass.  

Passet er raudt.

Nasjonalt ID-kort

Viss du har vorte norsk statsborgar kan du søke om nasjonalt ID-kort. Det er mogleg å få det nasjonale ID-kortet med reiserett, slik at du òg kan bruke det som eit reisedokument (på same måte som pass) når du skal reise til EU/EØS-landa og Sveits.

Reisebevis for flyktningar

Viss du har komme til Noreg som asylsøkar eller overføringsflyktning og har fått vern (asyl) i Noreg, kan du søke om å få reisebevis for flyktningar.

• Nytt reisebevis utskrive frå og med 19. oktober 2020 er blått.
• Reisebevis utskrive før 19. oktober 2020 er grønt.

Reisebevis utskrive før 19. oktober 2020 er framleis gyldig til utløpsdato.

Utlendingspass

Dersom du har opphaldsløyve i Noreg og det ikkje er mogleg for deg å skaffe pass frå heimlandet ditt, kan du søkje om eit ordinært norsk utlendingspass.

Utlendingspasset er vanlegvis gyldig i fleire år. Du må søke om å få utlendingspass. 

Du kan bruke dette som eit vanleg pass til å reise ut og inn av Noreg med, men du kan ikkje bruke det til å besøkje heimlandet ditt.

• Nytt utlendingspass utskrive frå og med 19. oktober 2020 er grått.
• Utlendingspass utskrive før 19. oktober 2020 er blått.

Utlendingspass utskrive før 19. oktober 2020 er framleis gyldig til utløpsdato

Utlendingspass for enkeltreise

Dersom du har opphaldsløyve i Noreg og du plutseleg må reise på ein viktig tur til utlandet, kan du søke om norsk utlendingspass for enkeltreise.

Det kan ikkje vere mogleg for deg å skaffe pass frå heimlandet ditt i tide før du skal reise. 

Utlendingspasset for enkeltreise er blått eller grått, avhengig av om det er utskriven før eller etter 19. oktober 2020 (sjå over). Det står i passet om det kan brukast til éin eller to reiser.