• Utanlandske statsborgarar som skal arbeide i Noreg, må vanlegvis ha opphaldsløyve. Du kan lese meir om ulike typar opphaldsløyve for arbeid.
• For at arbeidstakaren skal kunne søkje om eit opphaldsløyve for arbeid, må du gi han eller henne eit konkret arbeidstilbod. Dette gjer du vanlegvis ved å fylle ut UDI sitt arbeidstilboksskjema. Vel om du vil ha arbeidstilbodsskjema på bokmål (pdf, 2,3 MB) eller arbeidstilbodsskjema på nynorsk (pdf, 1,4 MB). 
• Ved mellom anna søknader om opphaldsløyve for faglærte og sesongarbeidarar kan arbeidsgivaren søkje på vegner av arbeidstakaren. Du må da ha ei skriftleg fullmakt frå arbeidstakaren. Du kan lese meir om dette på sidene for dei ulike opphaldsløyva. 
• Ved mellom anna søknader om opphaldsløyve for faglærte kan arbeidsgivaren også søkje på vegner av arbeidstakaren sin ektefelle/sambuar og barn. Du må da ha ei skriftleg fullmakt frå familiemedlemmene. Dersom du leverer søknadene for arbeidstakaren og familiemedlemmene samtidig, vil dei også få svar på søknadene samtidig.
• Du finn ei oversikt over ventetidene her. For søknader om oppholdsløyve som faglært gjeld følgjande: På grunn av at vi har mottatt eit stort antall søknader, samt at det er utfordringar med kontroll av utdanningsdokument i søknader som gjeld arbeid på yrkesfagleg nivå, kan det ta lenger tid å behandle slike søknader. Dette omfattar for eksempel søknader som gjeld arbeid som kokk, bilmekanikar, snekker, målar, murar og frisør. 
• Arbeidstakaren kan ikkje begynne å jobbe før han eller ho har fått eit opphaldsløyve. I nokre tilfelle kan arbeidstakaren likevel begynne å jobbe før søknaden er behandla, dersom de har fått ei stadfesting frå politiet om "tidleg arbeidsstart".
• Dersom arbeidstakaren får opphaldsløyve, vil det ha ein utløpsdato. Dei fleste opphaldsløyva kan fornyast. Arbeidstakaren må søkje om fornying seinast ein månad før løyvet går ut, for å behalde alle rettane sine. Vi tilrår at arbeidstakaren søkjer 2–3 månader før løyvet går ut. 

Utanlandske statsborgarar som skal arbeide i Noreg, må vanlegvis ha opphaldsløyve. Utanlandske statsborgarar kan få opphaldsløyve i Noreg på grunnlag av for eksempel arbeidsinnvandring, beskyttelse (asyl) og familieinnvandring.

Slik sjekkar du om arbeidstakaren har opphaldsløyve

Som arbeidsgivar må du sjekke at utanlandske arbeidstakarar har gyldig opphaldsløyve:

• Du sjekkar om arbeidstakaren har opphaldsløyve ved å be han eller henne vise fram opphaldskortet sitt. På opphaldskortet står det kva slags opphaldsløyve arbeidstakaren har.
• Familiemedlemmer av EU/EØS-borgarar kan bruke registreringsordninga for EU/EØS-borgarar. Nokre personar som ikkje sjølv er EU/EØS-borgarar, kan derfor ha opphaldsrett etter EU/EØS-regelverket som gir dei rett til å bu og arbeide i Noreg. Du sjekkar dette ved å be personen vise fram opphaldskortet sitt for å sjå at det står «opphaldsrett» på kortet. Du må òg sjekke at opphaldskortet er gyldig – sjå under «gyldig til»-dato på kortet.
• Nokre typar opphaldsløyve gir arbeidstakaren rett til å arbeide i alle slags jobbar, for eksempel opphaldsløyve for familieinnvandring eller permanent opphaldsløyve.
• Personar som har kome til Noreg som arbeidsinnvandrarar og har opphaldsløyve som faglært arbeidstakar med arbeidsgivar i Noreg, kan byte arbeidsgivar utan å søkje om nytt opphaldsløyve. Dei må likevel jobbe i same type stilling som før. Løna og arbeidsvilkåra må ikkje vere dårlegare enn det som er vanleg i Noreg, og arbeidstakaren må framleis oppfylle dei andre vilkåra for opphaldsløyve som faglært med arbeidsgivar i Noreg.
• Andre som har kome til Noreg som arbeidsinnvandrarar, har ofte eit opphaldsløyve som seier at dei berre kan jobbe i ein bestemt jobb hos ein bestemt arbeidsgivar. Dette vil stå på opphaldskortet deira. Dersom personen du ønskjer å tilsetje har eit slikt opphaldsløyve, må han eller ho få nytt opphaldsløyve før vedkomande kan begynne å jobbe hjå deg.
• Nokre asylsøkjarar som ventar på svar på søknaden sin, har lov til å arbeide. I slike tilfelle vil dei ha eit brev som stadfestar dette.
• Som arbeidsgivar kan du kontakte UDIs informasjonsteneste for å sjekke om arbeidstakaren har riktig type løyve.

Tilset du ein utanlandsk arbeidstakar utan riktig opphaldsløyve, kan du bli straffa med bøter eller fengsel.